البلاك بيري الكافر الداعر

السلام عليكم ورحمة الله وبركاته

بي بي وبي بي وخابينا فيه

على شنو ؟

سمعوا هاذي السالفة

اول شي اعترف انا من مناصرين الايفون من اول ما طلع الايبود تتش الى اخر ايفون الاس وانا معاه, والحين حبيته اكثر وتمسكت فيه اكثر, اليوم كنت بالديرة اشتري تلفون حق الوالدة بدال جهازها الاثري المهم وانا احوس بالمحلات  شفت البلاك بيري وحاشني فضول وقلت الا اجرب هذا الجهاز والا اعرف سرة بعت جهازي الثاني سامسونق الي شريته بس عشان اجرب نظام الاندوريد الي عليه وترى خوش نظام بس بعد ما ينافس نظام الايفون وخذيت بسعرة البلاك البيري الكافر الداعر

رجعت البيت ركبت خطي فيه ودخلت على الستنق اضبط برمجة الانترنت بس ما عرفت له فتحت المتصفح واشتغل معاي عادي بس كان بطئ بطئ بطئ مقارنة بالايفون وباي جهاز ثاني  قلت اوكي اجرب الماسنجر حطيت ايميلي والباسورد وحاولت ادخل يقولي الداعر الكافر

service not enabled for this handheld

يا ابن الحلال ادخل

مو راضي, اتصلت على خدمة العملاء وكلمتني وحدة عمرها 25 مو متزوجة تقولون شلون عرفت اقولكم من صوتها,  قتلها عزيزتي .. لا اضحك كنت بقولها عزيزتي بس ام العال يمي قتلها يا طويلة العمر السالفة كيت وكيت شنو اسوي في برمجة لازم تدزونها او انا اسويها يدوي قالت لا ماتسوي شي اهو يبرمج نفسه على الشبكة قتلها تمام, شكراً مع السلامة  حاولت فيه يمين يسار يا ولد الحلال اشتغل اشبك ادخل جربت الفيس بوك والايميل العادي وماسنجر الياهو وقوقل والهوتميل  هم ماكو فايدة  قلت زين شغلت الوايرليس وحاولت ادخل بعد ماكو فايدة  رديت دقيت عليهم هالمرة رد علي شاب وسيم تقولون شدراك انه وسيم اقولكم من صوته واضح انه وسيم المهم السلام عليكم وعليكم السلام ياخوي السالفة جذي وانا سويت جذي وزميلتك قالتلي جذي شنو المفروض اسوي قال تحط خدمة البلاك بيري, قتله واذا ما ابي احط خدمة البلاك بيري؟, قال لازم ولا الانترنت ما يشتغل عندك, قتله انا عندي خدمة الانترنت ومفتوحة شحقة احط بعد خدمة البلاك بيري, قال لا تشيل الي عندك وتركب خدمة البلاك بيري, قتله يالغالي انا مابي خدمة البلاك بيري غيغا وحدة ما تكفيني وانا مابي اشغل ماسنجر البلاك بيري ولا ابي اي خدمة خاصه فيه انا ابي استخدم الانترنت بشكل طبيعي مثل ماكنت استخدمة بكل اجهزتي, قال ما يصير قتله شلون ما يصير وخدمة الانترنت انا شحقة حاطها ؟, قال ترى نفس الشي بس خدمة البلاك بيري افضل ومميزاتها اكثر, قتله زين انا اشيل الي عندي واحط خدمة البلاك بيري بس شكثر اقدر ارسل واستقبل بيانات, قال على مزاجك مافي ليمت, قتله مافي لـيـــــمت جان قلت جذي من زمان حلوو جذي.. بس اكيد مافي رسوم اضافية مني مناك, قال لا مافي الا اذا تعديت الالف ميقا بايت  (يقولي الف ميقا يبي يخليني احس انها وايد), قتله يعني الليمت الف ميقا بس قال اي قتله خلاص بلاها بلاك بيري برجع حق حبيبي الايفون وايد احسن

قال الي يريحك

شكراً لك ومع السلامة

بس الحق ينقال الجهاز فيه مميزات وايد حلوة مثلاً

سرعة الانترنت فيه ابطأ من كمبيوتر صخر

واذا حاب تستخدمة في تصفح المواقع لازم تكون بلياقة بدنية عالية (صدقوني)

اي شي فيه انترنت ما يشتغل الا بعد ما تفعل خدمة البلاك بيري

وفيه وايرليس بس ماتقدر تستخدمة الا اذا كنت مفعل الخدمة, عيل شحقة حاطين الوايرليس فيه ؟

يعني بالعقل الي بيحط الخدمة بيشبك منها مو من الوايرليس, ادري ادري بتقولون يحط الخدمة ويشبك من الوايرليس اسرع

اقولكم عيل شحقة دافع حق الخدمة وشاري الجهاز الكافر الداعر ؟

وهذه مو حركة مسويتها الشركة عندنا هاذي حركة مسويتها شركة البلاك بيري

دخلت على موقع الشركة وسويت بحث سريع بمواقع الانترنت بعد وشفت ان برامج الجهاز تعتبر قطرة في بحر متجر الايتونز 

انا كنت اشتكي من الايفون لان الفيديوات لازم احولهم قبل ما انزلهم بس مع هذا الجهاز راح ارتاح من هاذي المشكلة لانه ما يشغل صيغ فيه الوضوح يكون عالي

الي بعرفة الحين شلون كانوا يقارنونه مع الايفون !!

واخيراً يشرفني ويسعدني ان اقول لكم بكل صراحة

شقد تافه البلاك بيري

والحمدلله صديقي الصدوق ليلحين عندي ما ضحيت فيه

دمتم بخير